કિર્તેશ પટેલ, સુરત: દેશની રાજધાની દિલ્હીમાં શાસન કરી રહેલી આમ આદમી પાર્ટી સુરત મહાનગરપાલિકાની ચૂંટણીમાં કૉંગ્રેસનો વિકલ્પ બની છે. અહીં કૉંગ્રેસને મોટો ફટકો પડ્યો છે. બીજી તરફ ગુજરાતમાં પ્રથમ વખત જ ચૂંટણીમાં ઉતરેલી આમ આદમી પાર્ટીએ 25 બેઠક જીતી લીધી છે. આમ આદમી પાર્ટીના 25 જેટલા ઉમેદવારો જીત્યા હોવાની ખુશી કાર્યકરોના ચહેરા પર સ્પષ્ટ જોવા મળી હતી. આમ આદમી પાર્ટીના કાર્યકરોએ આ જીતની ખુશી કેક કાપીને કરી હતી. વિજેતા ઉમેદવારોમાં વોર્ડ નંબર 16ની 22 વર્ષની પાયલનો પણ સમાવેશ થાય છે.
વોર્ડ નંબર-16માંથી પાયલ કિશોરભાઈ સાકરીયા આમ આદમી પાર્ટીના ઉમેદવાર હતા. પાયલની ઉંમર 22 વર્ષ છે. પાયલ સુરત શહેરની સૌથી નાની વયની ઉમેદવાર હતી. પુણા પશ્ચિમ વોર્ડ નંબર 16માંથી પાયલનો આમ આદમી પાર્ટીની પેનલ સાથે વિજય થયો છે.
પાયલ ફક્ત 22 વર્ષની ઉંમરે રાજકારણમાં આવી છે અને તેની જીત થઈ છે. પાયલની જીત બાદ સોસાયટીના લોકોએ ઢોલના તાલે પાયલનું સ્વાગત કર્યું હતું.
પાયલ જ્યારે પોતાની સોસાયટીમાં પહોંચી ત્યારે તેનું ફૂલ-હારથી સ્વાગત કરવામાં આવ્યું હતું. સોસાયટી અને પરિવારના લોકો ઢોલ અને નગારા સાથે પાયલનું સ્વાગત કરવામાં માટે હાજર હતા. આ પ્રસંગે પાયલે જણાવ્યું હતું કે, હું મારા વિસ્તારમાં ખૂબ સારા કામો કરીશ.
ચૂંટણી જીત્યા બાદ સોસાયટી ખાતે પહોંચેલી પાયલે પરિવારના વડીલોના આશીર્વાદ લીધા હતા. પરિવારના લોકોએ મીઠાઈ સાથે પાયલનું સ્વાગત કર્યું હતું.
વોર્ડ નંબર-16ની વિજેતા પેનલ: 1) જીતેન્દ્રભાઇ પાંચાભાઇ કાછડીયા 2) વિપુલભાઇ ધીરૂભાઇ મોવલીયા 3) શોભનાબેન કિરીટભાઇ કેવડીયા 4) પાયલ કિશોરભાઇ સાકરીયા
હાર્દિક પટેલના પ્રચારની અસર નહીં: સુરતમાં કૉંગ્રેસ નેતા હાર્દિક પટેલના પ્રચારની કોઈ અસર જોવા મળી નથી. 2015ની ચૂંટણી વખતે અહીં હાર્દિક પટેલ અને પાટીદાર આંદોલનની ખૂબ અસર જોવા મળી હતી. આ વખતે પાટીદારો પણ કૉંગ્રેસ પાર્ટીથી નારાજ જોવા મળ્યા હતા. આ દરમિયાન ગુજરાતમાં આમ આદમી પાર્ટીના પ્રવેશથી મતદારોએ કૉંગ્રેસના વિકલ્પ તરીકે આમ આદમી પાર્ટીની પસંદગી ઉતારી છે. આ કારણે જ સુરતમાં આપને 13 બેઠક મળી ચૂકી છે.
